Siamsalema

Saw pui, duak duak mai a! Phun nuah nuah chungin Siamsalema’n a naute eitur siam sa a lem zo leh ta duak duak mai le…..
Zodin Sq. vela tlangval,hmel mak tak kan ti dawn nge hmel na tak kan ti zawk dawn,cher ria lam pang,Jeans kekawr leh T-shirt rawng ung tawh lampangha,Boot rawngsang bun, Zion St. a tarmit pho ho hnen atanga a lei ‘Ray Ban; pawh ni lo, ‘Rei Band’ sunglass,cheng sawmsarih panga man aia to lo tih hriat fahran load rap ni tin i hmuh chuan, amah chu ruih tur leh eitur a hmuh hlah ngai lo mi,Siamsalema a ni tih hre rawh.
Siamsalema hi ” Aizawla piang leh seilian ka ni” inti ngam khawpa dawtsawi lama’ Thangchhuah’ pha ngat a ni a.An khua chu Chhim lam a nih thu leh a hapui to laia Aizawla rawn awm thla ve chauh a nih thu sawi lo turin min chah ngun hle.Tunah hian Aizawl tlang bulthuta Veng pakhatah a Ni Vungi-te inah a khawsa mek ani.A kum zat hi a sawi duh lo ve tlay.Ama insawi danin a ‘chhas’ neih tawh zatin a kum zat a lehpel tawh a ni awm e.Lehkha zir san aia Zawngtah kung lawn sang thei zawk Siamsalema hian Matric a pass lova,a Certificate leh eng eng emaw Xerox Copy pawimawh a neih ve chhunte aiin a ipte-a a pawisa ah saw a la tlem zawk leh nghal.A zirsan lam an zawh chang pawh hian a M.A,B.F,I.A.S, inti pha chin ngat ani.A lampum i zawh chuan saptawng nge kawltawng tih hriathran har khawpa saptawng paiin, Matric Appeared,But Failed In All Subjects, tiin a chhang ang che.
Ngun takin a hmel hi han thlek vel teh.Hram thei hmel a put laiin bu thei hmel a pu bawk si.Ngek thei hmel a pu a,nguk thei hmel a pu bawk.Naupang tahbelh tak tihthaih nana itawm tak hmel a nei.Amah hi i vawikhat hmuhnaah pawh i hmuh fo tawh hnu ang i ti mai thei.Nia, a hmel ang deuh i lo hmu tawh mai thei a sin.Discovery Channel-a Zawng atanga mihring insiam laia zawng,mihringa a chan hma deuh si, a laihawl vel a mi kha a ang lek lek.Tin, Cartoon Network-ah pawh a hmel ang deuh a awm,ka nauin a ti.Hla tak atanga ena vai hnathawk vil tur ni awm taka inchei Siamsalema hi i kawmchian chuan vai hnathawk pawh a tluk lo tih i hria ang.Amah kawm tuma a bul i pan hnaih chuan a awmna i thlen hma hauhin Perfume zawrhna dawra perfume man a zawhkual paha a inkah(spray),perfume rim rang ruaite, a lua hriak mawm tak,purun thlaka Alu kan mai theih ni awma a inthih mawm Lal Gulab rimte leh a ke lam atanga rim rawn chhuakte chuan an lo ur ang che’nga, a bula i va thutchilh chuan nizan hmasaa a nutei fanu Boomer thial lai a chhuhsak chu a lo thial nuap nuap ang.
Siamsalema hian engkim a hre’tep’ vek zel a, i duh zawng zawng i sawipui thei ang.Mahse, tunlai te hian a pa Manga Karimganj zin thu leh a U Kawnga Scooter lei thar chanchin bak a sawi tui thei tlatlo.Engpawh nise i ti ti duhzawng chu han sawipui phawt mai teh.Music lam han sawipui la,tawng hman lo lekin a siam ang che.Dawt leh thutak chawhpawlh a Pink Floyd hla’November Rain’ pui a tihzia te,Britney Spears in’ Eden par mawi chulhnu tivul leh turin’ tih Sap hlaa a sak mawi a tihzia te,Westlife drummer thiam turu ziate a hrilh hnu che chuan i bo map mai ang.Sports lamah han pakai puila,Cindy Crowford in Tennis a chawlhsan a ui zia te,Makedonia(Maradona a tihna) ball thiamzia tea hrilh hrep ang che.Tin,Politics lam han sawipui leh la,kan Prime Minister hlui,Tv AB Vajpayee nupui leh fanu hmeltha a tih thu a lo sawi ve tak avangin leh kan CM Zoramthanga hi sazu thlatu bulpui a nih thu a sawi avangin ti ti pui tlakah i ngai tawh lovanga, in ti ti hmaa,”PWD ah nge PHE ah nge Office-ah i thawh?” tia a zawt che pawh kha i thiam leh lawi si ang.
An vengah chuan a mah ai a ‘Mi khawlo Record’ neitha an awm lo ve teh tlat thung.A pian hmain an khuah tuma’n Bitter Slipper chhum an rui ngailo,he thil kher kher hi chu a ‘invent’ ve ngat a ni.He mihring hian inchhungkhur cheta hah vak lova hnathawh ai chuan ruihtur zawnga nilenga thlansa phulkaia tha sen a thlang zawk fo.Mahse, a ni hi chuan ruihtur a tlakchham dawn paw’n a ‘stock’ ColdAid leh Dendrite a khum hnuaia a dah khawl ruih tho.., a lungpang teh chiam lo.
Mahse, Pathianni tuka Siamsalema te venga i inkhawm chuan a hmel i hmu hlawl ang.Mak ti suh ang che.Inkhawm hi nuam a ti ve em em; achhante chu: Pakhatna, A pu Necktie awrh duh tawhloh (a thing lam tawh) awrh chhuahna ‘chance’ a ni.Pahnihna,’Chhas’ zawn a rem.Pathumna,Tihpui deuh ni,inkhawmpui nikhuain ei leh in a hnianghnar.
A chanchin chhelam ringawt sawia han tihtawp mai chu(h), a zialo deuh e.Mahse, a chanchin tha lam sawi dawn chuan a hmanlai nun sawi angai.Siamsalema hian hmanah chuan infiam te a thei ve em em thin,tin,music leh zai te chenin,han ti tha peih se aw!! Electric leh Coocker chhe siam te kha a hnehsawh em em thin a.A lehkha zirlai te kha chuan a thiam thei em em thin,hmanah kha chuan a chhungte’n a ‘Hlawhtlin Ni’ tur hi an ti thin kha a nia….mahse;hei, Siamsalema a lo ni ta si …! Siamtu’n thiamna leh finna,talent hlu leh ropui dawngin ava awm chiang em!
Kan Zoram hian Siamsalema ang hi a mamawh loh tehlul nen kan Zoram dung leh vangah hian Siamsalema ang hi kan va tam tak em.Hnathawh dawna bihruk zuk zuk ching,eitur leh ruihtur tlanbosan phal ngai silo,mahni eitur pawh siam peihlo.mi siamsa eizo duak duak thei zel si.Mahni hmelchhiatzia dawn lo leka lerh kawh hrep,phutawk hrethiam lo,chantawk duhtawk bawk si lo.Thil hre ve teuh thei tak,inti hre em em si,dawt leh thutak chawhpawlh titi thiam.Thatchhiatna leh dawngdahnate hi kan nih tur leh nih theih, ni thei lova min siamtu an va’n ni chiang em aw..!
Advertisements
This entry was posted in Uanghuang. Bookmark the permalink.

6 Responses to Siamsalema

  1. Anonymous says:

    hmelchhe bawk sual bawk ni maw Siamsalema chu? a nia lawm engmah ti peihlo nalh nileng zawi em em bawk si kan tam ta lutuk hi kan ram hmasawnna ti thuanawptu pakhat chu a ni.

  2. Anonymous says:

    hmelchhe bawk sual bawk ni maw Siamsalema chu? a nia lawm engmah ti peihlo nalh nileng zawi em em bawk si kan tam ta lutuk hi kan ram hmasawnna ti thuanawptu pakhat chu a ni.

  3. Achhaaa says:

    siamsalema chuan ‘one man band’ kha min ti hria!!tha khop mai,chhiar a man hla.

  4. Achhaaa says:

    siamsalema chuan ‘one man band’ kha min ti hria!!tha khop mai,chhiar a man hla.

  5. thinchhia says:

    achhaaa one man band chu beat contest naah hmaaaaaaaaaaaaanah ka hre tawh sin.mi huih a ni tih pawh ka hriat hma in.

  6. thinchhia says:

    achhaaa one man band chu beat contest naah hmaaaaaaaaaaaaanah ka hre tawh sin.mi huih a ni tih pawh ka hriat hma in.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s